Zirzəmisində insan sümükləri olan Nizaməddin məscidi nəzarətə götürülüb?
Bakının Əmircan qəsəbəsində yerləşən XIV əsrə aid Nizaməddin məscidinin zirzəmisi Məlumata görə, bura 1329-1330-cu illərdə Şirvanşahların hakimiyyəti dövründə tikilib.
Ehtimal edilir ki, zirzəmi XIV əsrin əvvəllərinə qədər olan müharibələr və basqınlar zamanı sığınacaq kimi istifadə olunub. Lakin sonradan bu zirzəmi sərdabə kimi xidmət göstərib. Tədqiqatlar zamanı burada tabutlar və insan skeletlərinə rast gəlinib. 1920-ci ildən sonra sərdabə bağlanıb və orada dəfn qadağan olunub.
Məsələ ilə bağlı Defakto.az Mədəniyyət Nazirliyinə sorğu ünvanlayıb.
Nazirlikdən sorğumuza cavab olaraq bildirilib ki, əraziyə mütəxəssislərin iştirakı ilə baxış keçirildikdən sonra sözügedən məsələ barədə dəqiq fikir söyləmək mümkün olacaq və bundan sonra atılacaq addımlar müəyyən ediləcək:
"Suraxanı rayonunun Əmircan qəsəbəsində yerləşən ölkə əhəmiyyətli memarlıq abidəsi olan Nizaməddin məscidində bir neçə il öncə bərpa işləri aparılıb. Tarixi abidənin mühafizə olunmasına Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin abidə mühafizəçiləri tərəfindən nəzarət olunur. Məscidin zirzəmi hissəsində insan sümüklərinin mövcudluğu ilə bağlı müxtəlif fikirlər var. Əraziyə mütəxəssislərin iştirakı ilə baxış keçirildikdən sonra sözügedən məsələ barədə dəqiq fikir söyləmək mümkün olacaq və bundan sonra atılacaq addımlar müəyyən ediləcək", - deyə cavabda qeyd edilib.
