ABŞ xaricdəki 30-a yaxın səfirliyi və konsulluğunu bağlamağı düşünür

ABŞ prezidenti Donald Trampın administrasiyası xaricdəki diplomatik mövcudluğun əhəmiyyətli dəyişiklikləri fonunda xaricdəki 30-a yaxın səfirlik və konsulluğun bağlanmasını nəzərdən keçirir.

Defakto.az xəbər verir ki, bu barədə “CNN”nin əldə etdiyi ABŞ Dövlət Departamentinin daxili sənədində bildirilir.

Həmin sənəddə, həmçinin ABŞ-nin Somali və İraqdakı diplomatik nümayəndəliklərinin sahəsinin azaldılması tövsiyə olunur. Bu iki ölkə ABŞ-nin antiterror fəaliyyətində mühüm rol oynayır. Bundan əlavə, sənəddə digər diplomatik nümayəndəliklərin ölçüsünün də dəyişdirilməsi təklif olunur.

Bildirilib ki, sənəddə 10 səfirliyin və 17 konsulluğun bağlanması tövsiyə edilir. Onların çoxu Avropa və Afrikada yerləşir, lakin Asiya və Karib hövzəsində də bağlanması nəzərdə tutulan nümayəndəliklər var. Siyahıya Malta, Lüksemburq, Lesoto, Konqo Respublikası, Mərkəzi Afrika Respublikası və Cənubi Sudandakı səfirliklər daxildir. Eyni zamanda, Fransada beş, Almaniyada iki, Bosniya və Herseqovinada iki, Böyük Britaniyada bir, Cənubi Afrikada və Cənubi Koreyada bir konsulluğun bağlanması planlaşdırılır.

Sənəddə təklif olunur ki, bağlanan səfirliklərin funksiyalarını qonşu ölkələrdəki diplomatik nümayəndəliklər yerinə yetirsin.

Həmidə İbrahimova