Azərbaycanda qayınata gəlinini öldürməkdə şübhəli bilinir - YENİLƏNİB
Tərtərdə baş verən qətllə bağlı cinayət işi başlanıb
Baş Prokurorluğun Mətbuat xidmətindən Defakto.az-a bildirilib ki, mayın 13-də saat 10 radələrində Tərtər rayonu, Poladlı kənd sakini 1990-cı il təvəllüdlü Hafizə Rzayevanın yaşadığı evdə öldürülməsi barədə rayon prokurorluğuna məlumat daxil olub.
İlkin araşdırmalarla 1957-ci il təvəllüdlü Şəhriyar Hüseynovun aralarında yaranmış mübahisə zamanı bıçaqla xəsarətlər yetirərək gəlini Hafizə Rzayevanı qəsdən öldürməsinə əsaslı şübhələr müəyyən edilib.
Faktla bağlı rayon prokurorluğunda Cinayət Məcəlləsinin üzrə 120.1-ci (qəsdən adam öldürmə) maddəsi ilə cinayət işi başlanıb. Şəhriyar Hüseynov iş üzrə şübhəli şəxs qismində tutulub.
Hazırda istintaq davam edir.
***
Tərtərdə qətl hadisəsi baş verib.
Defakto.az-ın APA-ya istinadən xəbərinə görə, hadisə rayonun Poladlı kəndində qeydə alınıb.
Hadisə ailə-məişət münaqişəsi zəminində baş verib.
Tərtərin Poladlı kəndində 1990-cı il təvəllüdlü Hafizə Rzayevanı qətlə yetirməkdə şübhəli bilinən 1957-ci il təvəllüdlü qayınata Şəhriyar Hüseynov polis əməkdaşları tərəfindən saxlanılaraq istintaqa təhvil verilib.
Faktla bağlı Tərtər rayon prokurorluğunda araşdırma aparılır.
