Xırdalanda uşaqlar yanğına səbəb OLDULAR: Araşdırmalara başlanıldı
Abşeron rayonu, Xırdalan şəhərində fərdi yaşayış evinin həyətində uşaqların yanğına səbəb olması ilə bağlı araşdırma aparılır.
Bu barədə Defakto.az-a Daxili İşlər Nazirliyinin (DİN) Mətbuat Xidmətinin əməkdaşı polis leytenantı Elbrus İbrahimov məluat verib.
O bildirib ki, daxil olmuş müraciət əsasında ərazi üzrə polis orqanında təhqiqat araşdırması aparılır.
Fevralın 2-də Abşeron rayonu, Xırdalan şəhərində fərdi yaşayış evinin həyətində yanğın baş verib.
Defakto.az xəbər verir ki, hadisənin uşaqlar tərəfindən törədilməsi ilə bağlı görüntülər yayılıb.
Videoda bir neçə uşağın yaşayış evinin hasarını aşaraq həyətdə yanğın törətməsi əks olunub.
Fövqəladə Hallar Nazirliyindən (FHN) Defakto.az-ın sorğusuna cavab olaraq bildirilib ki, yanğın söndürülərək yaxınlıqdakı tikililərə keçməsinin qarşısı alınıb:
"Fövqəladə Hallar Nazirliyinin "112" qaynar telefon xəttinə Abşeron rayonu, Xırdalan şəhərində fərdi yaşayış evinin həyətində taxta tullantılarının yanması barədə məlumat daxil olub. Yanğın yanğınsöndürənlər tərəfindən söndürülüb. Ev və yaxınlıqdakı tikililər yanğından mühafizə olunub".
Hadisə yerindən görüntüləri təqdim edirik:
Aygün Mirakif
