Qurban Qurbanovun düzgün əvəzetmələri "Qarabağ"ı Avropa lideri edib
Avropanın milli çempionatlarında əvəzetmələri ən uğurlu edən komanda "Qarabağ"dır.
Defakto.az xəbər verir ki, Ağdam klubu Premyer Liqanın 28-ci turunda "Turan Tovuz"la səfər matçında zirvəni ələ keçirib.
Belə ki, həmin görüşün 90-cı dəqiqəsində əvəzetmə ilə meydana daxil olan Aleksey Kaşuk cəmi 2 dəqiqə sonra son nöqtəni qoyub və komandasının 4:1 hesablı qalibiyyətində pay sahibi olub.
Bununla Qurban Qurbanovun cari mövsüm əvəzetmədən meydana buraxdığı futbolçuların ümumi qol sayı 19-a yüksəlib. Serbiya klubu "Srvena Zvezda" və Şotlandiya "Seltik"i də Azərbaycan təmsilçisi ilə eyni göstəriciyə malikdir. Lakin fərq ondadır ki, "Qarabağ" bunu 28 oyunda bacarıbsa, "Srvena Zvezda" 29, "Seltik" isə 31 qarşılaşmada reallaşdırıb.
Qeyd edək ki, Misli Premyer Liqasının lideri "Qarabağ" cari mövsüm 28 turda ümumilikdə 69 qol vurub.
