"Toplum TV"nin əməkdaşları hakim qarşısına çıxarıldılar
"Toplum TV"nin əməkdaşlarının cinayət işi üzrə ilk məhkəmə hazırlıq iclası keçirilib.
Defakto.az-ın məlumatına görə, Bakı Ağır Cinayətlər Məhkəməsinin hakimi Azər Tağıyevin sədrliyi ilə keçirilən prosesdə təqsirləndirilənlərin vəkilləri müvəkkilləri barədə seçilmiş həbs qətimkan tədbirlərinin ev dustaqlığı ilə əvəz olunmasını istəyiblər.
Məhkəmə müdafiə tərəfin prosesdə tam iştirak etməməsini nəzərə alaraq cinayət işinin məhkəmə baxışına verilməsi təxirə salınıb.
Hakimlər qısa müşavirədən sonra vəkillərin vəsatətlərini təmin etməyib.
Daha sonra təqsirləndirilənlərin anket məlumatları dəqiqləşdirilib.
Növbəti proses aprelin 24-nə təyin edilib.
Daxili İşlər Nazirliyinin Mətbuat Xidmətinin yaydığı məlumata görə, paytaxtın Nərimanov rayonu, Y.V.Çəmənzəminli küçəsi, ev 98B ünvanında yerləşən ofisdə və əlavə digər ünvanlarda bir qrup şəxsin fəaliyyəti ilə bağlı daxil olan məlumat üzrə polis əməkdaşları əməliyyat-axtarış tədbirləri keçiriblər.
İstintaq araşdırması zamanı "Toplum TV"nin təsisçisi Ələsgər Məmmədli, redaktoru Müşfiq Cabbarov, Demokratik Təşəbbüslər İnstitutunun rəhbəri Akif Qurbanov, Demokratik Təşəbbüslər İnstitutunun əməkdaşı Əli Zeynalov, "III Respublika" Platformasının qurucu heyət üzvü Ruslan İzzətli, Ramil Babayev, İlkin Əmrahov, Şahnaz Bəylərqızı məsuliyyətə cəlb olunublar.
Elgün Həsənli
