Uzun müddət AMEA prezidenti ilə yaxın münasibətləri olduğu deyilən sabiq deputat Elton Məmmədov AMEA ətrafında yaranmış böhranla bağlı DİA.az saytına müsahibə verib. Defakto.az müsahibəni təqdim edir:
– Elton müəllim, alimlərin ölkə rəhbərliyinə çağırışından xəbərdarsınız. Necə dəyərləndirirsiniz bu təşəbbüsləri, sizcə gecikmiş addım deyil ki?
– Əvvəla deyim ki, mən də bu çağırışlara qoşuluram və hesab edirəm ki, Ramiz Mehdiyevin AMEA rəhbərliyində qalması Azərbaycan elminə böyük bir təhlükədir. Bu gün geciksək də, yenə də gec deyil. Azərbaycan elmini xilas etməliyik. Biz cənab Prezidentə dəstək verməliyik. Biz cənab Prezidentə edilən çağırışlara dəstək verməliyik ki, Azərbaycan elmini Ramiz Mehdiyev adlı böyük bəladan xilas edək.
Bir insanın təkəbbürü ilə dövlət nə qədər oynamalıdır? Mən ona görə də Ramiz Mehdiyevin gedişi ilə bağlı səslənən çağrıışları dəstəkləyirəm.
Ramiz Mehdiyev AMEA-da sanki ikinci Prezident Aparatı yaradıb orda. Özünə ayrıca “dövlət” qurub. Bunun elmdən anlayışı yoxdur. Bu adam hazırda AMEA-dan siyasi platforma kimi istifadə edir və AMEA-nın arsenalından özünün siyasi ambisiyaları üçün yararlanmaqdadır. Bu gün AMEA-nən rəsmi saytı da Ramiz Mehdiyevin cılız siyasi maraqlarının müdafiəçisinə çevrilib.
– Elton müəllim, bilirik ki, Siz AMEA-da yüksək vəzifələrdə təmsil olunmusunuz və sonuncu dəfə də işlər idarəsinin müdiri olmusunuz. Necə oldu ki Siz AMEA-da və həm də Ramiz Mehdiyevin dövründə vəzifələrdə təmsil olundunuz?
– Mən elmdə yeni adam deyiləm, bundan xəbərdarsınız. Texnika elmləri doktoruyam, professoram. 2006-cı ildən Texniki Universitetdə elmi və pedoqoji fəaliyyətlə məşğul olmuşam və hazırda da bu fəaliyyətim davam edir. 2019-cu ilin noyabrında Ramiz Mehdiyev məni AMEA-ya dəvət etdi. Mən o zaman artıq Tezniki Universitetdə prorektor idim strateji məsələlər üzrə…
Məni dəvət etdi. Məni Yüksək Texnologiyalar Parkına rəhbər kimi dəvət etdi. Mən də ona planlarımı açıqladım, yəni hansı işləri görəcəyimi və hansı sahədə nailiyyətlərin əldə oluna biləcəyini. Doğrudan da çox qısa müddət ərzində mən AMEA-da böyük nailiyyətlər əldə edə bildim.
Ramiz Mehdiyev məni AMEA-ya dəvət edərkən, xahiş etdi ki, gəlib ona dəstək verim. Mən də təbii ki ona yox, Azərbaycan elminə dəstək vermək üçün əlimdən gələni etməyə hazır idim və bu gün də hazıram. Ona görə də təklifini qəbul etdim və qısa müddət ərzində də kifayət qədər böyük işlər görə bildim.
– Bəs Sizin Ramiz Mehdieyvlə münsaibətləriniz nə zamandan korlandı?
– Korlanmaq nəyə deyirsiniz?
– Sualı belə qoyaq: Sizə qarşı niyə və nə zaman çevrildi?
– Ramiz Mehdiyev qeyd etiyim kimi AMEA-da bir ailə idarəetməsi formalaşdırmaqda idi. Kürəkəninin qardaşı Fikrət Əliyevi mənə müavin gətirdi. Yəni işlər idarəsinin müdir müavini vəzifəsinə. Hazırda da işlər idarəsinin müdir vəzifəsini icra edir. Mən buna, eyni zamanda da mətbuatda da səsləndirdiyim kimi “Şərq-Qərb” mətbəəsinin xəttilə təkcə bir tenderdə 10 milyondan artıq büdcə vəsaitinin mənimsənilməsinə və digər bu kimi hallara etirazımı bildirdim. Onun diqqətinə çatdırdım ki, artıq sizin bu fəaliyyətləriniz Hesalama Palatasının hesabatlarında əks olunub.
Orda, mənim rəhbərliyim altında ayrıca olaraq təchizat idarəsi yaratmaq istəyirdilər. Halbuki bütün bunlar qanuna zidd idi. Mən buna da etiraz etdim.
Eyni zamanda kürəkəninin qardaşı da artıq müəyyən işləri görməkdə idi və bütün bunlar da nəhayətdə Ramiz Mehdiyevlə toqquşmağımıza gətirib çıxardı.
Sizə bildirim ki, Ramiz Mehdiyev heç də dərin adam deyil və onun geriləmiş məfkurəsi var. O heç vaxt iti zəkaya sahib olmayıb. O ancaq özünə var dövlət yığmaqla məşğul olub və onun bütün şəxsi qabiliyyəti də məhz buna hesablanıb. Hər zaman Heydər Əliyevin kölgəsində olub və onun barəsində yanlış “dövlət adamı” təəssüratı yaranıb. Halbuki Ramiz Mehdiyev geri məfkurədə olan birisidir.
Ramiz Mehdiyev hətta mən işdən çıxanda da yalandan ölkə rəhbərliyinin adını hallandırdı ki, guya, dövlət başçısı belə istəyir. Halbuki mən AMEA-ya gələndə də demişdi ki, ölkə rəhbərliyi bunu istəyir. Yəni bu adam sonuna qədər hiyləgər adamdır və hər zaman hiylə ilə idarə edib, dedi-qodu ilə işini bitmiş hesab edib.
Fəaliyyətim dövründə mənim gördüyüm işləri halbuki tərifləyirdi, etiraf edirdi. Deyirdi ki, akademiya sistemində kimsə bu qədər böyük işlər görə bilməz. Yəni bu adam hər zaman olduğu kimi, AMEA-da pambıqla baş kəsir.
– Bir açıq sualımız da var. Ramiz Mehdiyevin adı buna qədər yetərincə Rusiya ilə qoşa çəkilib. Yəni mətbuatda, siyasi kuluarlarda Ramiz Mehdiyev “Kremlin adamı” kimi xarakterizə olunub. Və buna görə də hazırda ictimaiyyətdə ən populyar olan qənaətlərdən biri belədir ki, Ramiz Mehdiyev Rusiyanən çətiri altında olduğundan ona toxuna bilmirlər… Sizcə burada həqiqət payı nə qədərdir?
– Mən ilk başdan qeyd edim ki, bizim cənab Prezidentimiz kifayət qədər müstəqil siyasət yürüdür və bunu həm Azərbaycanın daxili, həm də xarici siyasətlərində də görmək mümkündür. Eyni zamanda 44 günlük Vətən Müharibəsi dövründə də cənab Prezident İlham Əliyev Azərbaycanın dövlət müstəqilliyinin, hansısa kənar gücün təsiri alında olmadığını dəfələrlə nümayiş etdirdi.
Ona görə də hesab edirəm ki, Ramiz Mehdiyevin kimlər tərəfindənsə himayə olunması faktı onun AMEA rəhbərliyində saxlanılması üçün əsas ola bilməz. Yəni kimsə təsir edə bilməz bu məsələyə.
İnanmıram ki, cənab Prezident hansısa gücün təsiri ilə Azərbaycan elmini bir nəfərə qurban versin…
– Daha bir sual: Ramiz Mehdiyevin Rusiya ilə əlaqələrinin olması, daha dəqiqi, onun RUSİYANIN ADAMI olması faktı Sizcə nə qədər doöğrudur?
– Mən bildiyim budur ki, hələ özünün də etiraflarına görə, Ramiz Mehdiyevin Rusiya ilə əlaqələri o zaman Mərkəzi Komitəinin katibi olmuş Romanovun vaxtlarından başlayır. Hələ o zamandan Ramiz Mehdiyev Rusiya ilə yaxın idi və Romanovla şəxsi dostluq əlaqələri var idi. Onun Rusiya bağı kökləri ordan gəlir. Təbii ki, sonradan xidməti vəzifəsi ilə də əlaqədar Rusiyaya davamlı səfərləri olub və bu səfərlər boyunca Rusiya ilə daha da yaxınlaşıb. Hər halda Putinin onun boynundan medal asması da təsadüfi sayıla bilməz.
