Gürcüstanın paytaxtı Tbilisidə Azərbaycan, Gürcüstan və Türkiyə hökumətləri arasında Gömrük Məsələləri üzrə Üçtərəfli Komitənin iclası keçirilib.
“DEFAKTO.az” xəbər verir ki, iclasda Azərbaycanı Dövlət Gömrük Komitəsinin sədri Şahin Bağırov təmsil edib.
Görüşdə tərəflər arasında “Bakı-Tbilisi-Qars dəmir yolu layihəsi çərçivəsində tranzit gömrük prosedurlarının asanlaşdırılması üçün ilkin məlumat mübadiləsinə dair Saziş”lə bağlı məlumat mübadiləsinin həyata keçirilməsi müzakirə olunub.
Layihənin siyasi, iqtisadi və strateji əhəmiyyəti qeyd olunub, regional və beynəlxalq ticarət həcminin daha da artmasına, hər üç ölkənin tranzit imkanlarının genişləndirilməsinə, eləcə də gömrük prosedurlarının sadələşdirilməsinə əlavə imkanlar yaradacağı bildirilib.
Üçtərəfli görüşün nəticəsi olaraq yekun protokol imzalanıb.
İclas çərçivəsində Dövlət Gömrük Komitəsinin sədri Şahin Bağırov, Türkiyə Respublikasının ticarət nazirinin müavini Sezai Uçarmak və Gürcüstan Maliyyə Nazirliyinin Gəlirlər Xidmətinin rəhbəri Levan Kakava ilə ayrılıqda ikitərəfli görüşlər də keçirib. Hər iki görüşdə ikitərəfli əsasda mövcud olan münasibətlərə dair fikir mübadiləsi aparılıb və gələcək inkişaf perspektivləri ətrafında müzakirələr edilib.
Eyni zamanda, yeni kompüterləşdirilmiş tranzit sistemi, sərhədlərin birgə idarəolunması, dəmiryolu daşımalarında məlumat mübadiləsi, səlahiyyətli iqtisadi operatorlar və digər məsələlər müzakirə olunub, Azərbaycan gömrüyünün Avtomatlaşdırılmış Risk Analizi Sistemi (ARAS) layihəsi ilə bağlı məlumat verilib.
