“Dağlıq Qarabağ”ın ləğvi qaçılmaz idi”.
Bunu Ermənistanın baş naziri Nikol Paşinyan deyib.
Paşinyan qeyd edib ki, rəsmi İrəvan bütün resurslarını Dağlıq Qarabağ respublikasının yaradılmasına sərf edib, bu isə həll olunmaz bir məsələ idi.
“Deyirlər ki, o vaxt “Dağlıq Qarabağ”ın o vaxtkı hakimiyyəti (2023-cü ilin payızında – red.) Dağlıq Qarabağı ləğv edib. Əslində isə bu proses 2016-cı ilin avqustunda danışıqlar prosesində məzmunlu dəyişikliklər nəticəsində qaçılmaz oldu”, – deyə baş nazir vurğulayıb.
“Biz hakimiyyətə gələndə təbliğat obyekti statusumuz dəyişdi, çünki biz artıq informasiya daşıyıcısına çevrildik və emosional qavrayışla reallıq arasında böyük uçurumun olduğunu gördük. Yəni emosional təsəvvürlərimizi həyata keçirmək üçün bütün resurslardan istifadə etdik. Hakimiyyətə gəldikdə isə bəyan etməli olduq ki, bu emosional qavrayışın həyata keçirilməsi mümkün deyil”, – deyə Paşinyan bildirib.
O, qeyd edib ki, indiki hakimiyyətin təqsiri ondadır ki, onlar xalqla bu barədə danışmayıb, hətta onun özü də bu praqmatik reallıqla barışa bilməyib.
“Belə bir söhbətə başlamağın emosional imkansızlığı ondan ibarət idi ki, bu, Ermənistan Respublikasına və xalqına 30 il əvvəl həll olunmayan bir problemə görə sadəcə vaxt itirdiyimizi, resurs sərf etdiyimizi bildirmək demək idi”, – deyə Paşinyan əlavə edib.
Mənbə: ria.ru
