İki ildən artıqdır təmirə bağlanan Bakı Zooloji Parkında yenidənqurma işləri tamamlanmaq üzrədir.
Bu barədə Zooparkdan məlumat verilib. Bildirilib ki, parkda təxminən 2-2,5 aylıq iş qalıb. Təmir işləri tam bitəndən sonra Bakı Zooparkı ziyarətçilərin üzünə açılacaq:
“Hazırda pandemiya şəraiti olduğuna görə təmirin nə vaxt bitəcəyi ilə bağlı konkret vaxt deyə bilmirik. Açılışdan sonra ziyarətçiləri bir çox xoş sürprizlər gözləyir. Zooparkın ərazisi 2 hektar böyüdülüb və 4 hektara çatdırılıb. Burada saxlanılan heyvanların sayı da artırılıb. Həmçinin akvariumlar, terrariumlarla, heyvanların yaşayış arealı ilə bağlı yeniliklər olacaq”.
Qeyd edək ki, Bakı Zooparkında 2019-cu ilin fevral ayından bəri təmir işləri aparılır. Zooparkdakı heyvanlar Qaradağ rayonunda yaradılmış müvəqqəti sığınacağa yerləşdiriliblər.
